Jeremiah 49

Ilizwi Ngama-Amoni

1Mayelana lama-Amoni: Nanku akutshoyo uJehova: “U-Israyeli kalamadodana na? Kalazindlalifa na? Pho kungani uMoleki esethumbe iGadi na? Kungani abantu bakhe behlala emadolobheni alo na?

2“Kodwa izinsuku ziyeza,” kutsho uJehova, “lapho engizahlaba khona umkhosi wempi wokumelana leRabha yama-Amoni: izakuba yindunduma yonxiwa; lemizi eseduze layo izathungelwa ngomlilo. Ngakho u-Israyeli uzabaxotsha labo ababemxotshele phandle,” kutsho uJehova.

3“Lila weHeshibhoni, ngoba i-Ayi ichithekile! Khalani lina elihlala eRabha! Gqokani amasaka lilile; gijimelani lapha lalaphaya phakathi kwemiduli, ngoba uMoleki uzathunjwa, ndawonye labaphristi bakhe kanye lezikhulu zakhe.

4Lizincomelani ngezigodi zenu, lizincomelani ngezigodi ezithela kangaka? Wena ndodakazi engathembekanga, uthemba inotho yakho uthi, ‘Ngubani ozangihlasela na?’

5Ngizalilethela ukwesaba okuvela kubo bonke abaseduze lani,” kutsho uJehova, uJehova uSomandla. “Lonke lizaxotshelwa khatshana, njalo kakho ozaqoqa ababalekayo.

6“Kodwa emva kwalokho ngizabuyisela inhlanhla yama-Amoni,” kutsho uJehova.

Ilizwi Nge-Edomi

7Mayelana le-Edomi: Nanku akutshoyo uJehova uSomandla: “Kakuselakuhlakanipha eThemani na? Izeluleko sezaphela na kwabahlakaniphileyo? Ukuhlakanipha kwabo sekwabola na?

8Phendukani libaleke, licatshe ezimbalwini ezitshonayo, lina elihlala eDedani, ngoba ngizaletha umonakalo phezu kuka-Esawu ngesikhathi engizamjezisa ngaso.

9Uma abavuni bamavini befika kini kabangeze batshiya amalutshwana na? Uma amasela efika ebusuku angeze antshontsha okunengi njengokufisa kwawo na?

10Kodwa u-Esawu ngizamhlubula asale eze; ngizakwembula izindawo zakhe zokucatsha, ukuze angacatshi. Abantwabakhe lezihlobo zakhe kanye labomakhelwane bakhe bazabhubha laye angabi khona futhi.

11Tshiya izintandane zakho; ngizavikela impilo yazo labafelokazi bakho bangathemba kimi.”

12UJehova uthi: “Uma labo abangafanelanga ukunatha inkezo kumele bayinathe, kungani wena ungeze wajeziswa na? Kawuyikuphutha ukujeziswa, kumele uyinathe. 13Ngifunga ngami,” kutsho uJehova, “ukuthi iBhozira izakuba lunxiwa lento yokwesatshwa, eyokuthukwa lokuqalekiswa, njalo wonke amadolobho ayo azakuba ngamanxiwa nini lanini.”

14Sengizwe ilizwi elivela kuJehova: Kuthunywe isithunywa ezizweni ukuba sithi, “Buthanani ukuba liyihlasele! Vukani lilwe impi!”

15“Khathesi ngizakwenza ube mncane phakathi kwezizwe, udeleleke ebantwini.

16Ukuthuthumela okungabangwa nguwe, lokuzigqaja kwenhliziyo yakho kukukhohlisile, wena ohlala emikenkeni yamadwala, wena ohlala ezingqongeni zoqaqa. Lanxa usakhela isidleke sakho phezulu njengengqungqulu, ukhonapho ngizakwehlisela phansi,” kutsho uJehova.

17“I-Edomi izakuba yinto yokwesatshwa, bonke abadlula khona bazathuthumela baklolode ngenxa yamanxeba ayo wonke.

18Njengokuchitheka kweSodoma leGomora, kanye lamadolobho awo ayeseduze,” kutsho uJehova, “ngakho kakho ozahlala kuyo.

19“Njengesilwane siphuma emajukujukwini aseJodani sisiya emadlelweni amahle, i-Edomi ngizayixotsha elizweni layo ngesikhatshana. Ngubani okhethiweyo engingammisela lokhu na? Ngubani onjengami ongamelana lami na? Nguwuphi umalusi ongajamelana lami na?

20Ngakho, zwanini lokho uJehova asecebe ukukwenza nge-Edomi, lokho asefune ukukwenza kulabo abahlala eThemani: Amazinyane omhlambi azadonselwa le; amadlelo awo uzawatshabalalisa ngokupheleleyo ngenxa yabo.

21Ekuzwakaleni komsindo wokuwa kwabo umhlaba uzagedezela, ukukhala kwabo kuzazwakala eLwandle oluBomvu.

22Khangelani! Ingqungqulu izaqonga iphinde yehlele phansi, yelulele izimpiko zayo phezu kweBhozira. Ngalolosuku izinhliziyo zamabutho ase-Edomi zizakuba njengenhliziyo yowesifazana ohelelwayo.

Ilizwi NgeDamaseko

23Mayelana leDamaseko: “IHamathi le-Ariphadi athithibele, ngoba azwe izindaba ezimbi. Adanile, akhathazeke njengolwandle olungelakuphumula.

24IDamaseko isibe buthakathaka, isiphendukile ukuba ibaleke, isiphethwe layikuphaphazela; ibanjwe lusizi lobuhlungu, ubuhlungu obunjengowesifazana ohelelwayo.

25Kungani idolobho lodumo lingadelwanga, idolobho engithokoza ngalo na?

26Ngeqiniso izinsizwa zayo zizakuwa emgwaqweni; amabutho ayo wonke azathuliswa ngalolosuku,” kutsho uJehova uSomandla.

27“Imiduli yaseDamaseko ngizayithungela ngomlio; uzaqothula izinqaba zaseBheni-Hadadi.”

Ilizwi NgeKhedari LeHazori

28Mayelana leKhedari lemibuso yaseHazori, eyahlaselwa nguNebhukhadinezari inkosi yaseBhabhiloni: UJehova uthi: “Vuka uhlasele iKhedari ubhubhise labantu baseMpumalanga.

29Amathente abo lemihlambi yabo kuzathunjwa; amakhetheni abo azathathwa layo yonke impahla yabo kanye lamakamela abo. Abantu bazaklabalala besithi kubo, ‘Ukwesaba enhlangothini zonke!’

30“Balekani ngokuphangisa! Hlalani ezimbalwini ezitshonayo, lina elihlala eHazori,” kutsho uJehova. “UNebhukhadinezari inkosi yaseBhabhiloni usecebe icebo ngani, usebumbe icebo ngani.

31“Vukani lihlasele isizwe esizinzileyo, esihlezi ngethemba,” kutsho uJehova, “isizwe esingelawo amasango kumbe imigoqo; abantu baso bahlala bodwa.

32Amakamela aso azakuba yimpango, lemihlambi yabo emikhulu izakuba yimpango. Ngizabahlakazela emoyeni labo abasezindaweni ezikude njalo ngizaletha umonakalo kubo uvelela enhlangothini zonke,” kutsho uJehova.

33“IHazori izakuba yisikhundla samakhanka, indawo echithekileyo nini lanini. Kakho ozahlala khona, akulamuntu ozahlala kuyo.”

Ilizwi Nge-Elami

34Leli yilizwi elafika kuJeremiya umphrofethi mayelana le-Elami, ekuqaleni kombuso kaZedekhiya inkosi yakoJuda, elathi:

35UJehova uSomandla uthi: Khangela, idandili le-Elami ngizalephula, insika yamandla abo.

36Ngizalethela i-Elami imimoya emine ezavela emagumbini amane amazulu, ngizabahlakazela emimoyeni emine, njalo akuyikuba lesizwe abathunjwe e-Elami abangayikuya kuso.

37I-Elami ngizayibhidliza phambi kwezitha zayo, phambi kwalabo abafuna ukubabulala. Ngizakwehlisela umonakalo phezu kwabo kanye lolaka lwami oluvuthayo,” kutsho uJehova.

38Ngizabeka isihlalo sami sobukhosi e-Elami ngichithe inkosi yayo lezikhulu zayo,” kutsho uJehova.

39“Kodwa inhlanhla ye-Elami ngizayibuyisa ezinsukwini ezizayo,” kutsho uJehova.